العدد الثالث

آرائنا
====
إنت عارف إنت بتكلم مين؟
****************
جملة مرعبة جداً أكيد إنتوا عارفين
من أنت الذى تقولها؟
ولماذا نعرف إنت مين؟
هل أنت مشهور لهذه الدرجة!
الغريب إن الذى ينطقها يحسسك إنه رئيس جمهورية
،،،تعالو معانا نناقش هذه المشكلة
ذات يوم نزلت الشارع أشوف إيه أخر الأخبار فى الدنيا
فقابلت أحد المارة فى الطريق فسألته هذه الأسئلة
إسمك ؟ فقال سامح محمد
كام سنة؟ فقال 21 سنه
المؤهل؟ فقال معهد فنى تجارى
هل تسمع هذه الجملة أو أنت تقولها (إنت عارف إنت بتكلم مين )
فقال طبعا أعرفها وأنا بقولها كتير
فسألته إنت مين علشان تقول كده
فقال أنا أعرف رتب كتير فى وزارة الداخلية يعنى واصل
فسألته لماذا تقولها
فقال أنا بقولها لما بأكون فى مشكلة من أى نوع وأكلم معارفى تخلص المشكلة فوراً
شكرا يأخ سامح
وشد إنتباهى فى إشارة مرور أمين شرطة يعلو صوته على أحد سائقى السيارات
كما شد إنتباهى أيضا شكل السيارة فإنها موديل حديث زجاج فاميه
أرقام السيارة مش مكتوبه غير كلمة ملاكى القاهرة
وعند سؤال أمين الشرطة فقال هو أنا كل مأقول لحد رخصك يقولى إنت مش عارف إنت بتكلم مين
ويكلم ضابط قريبه أو معرفة وأضطر أمشيه بدون سحب الرخصة أو حتى مخالفة
وطبعا كان مع أمين الشرطة الحق لأن منظر السيارة يقلق للأسف مكنش معاى الكاميرة
وخفت لأمين الشرطة يقلب عليا فمشيت
وفضلت ماشى ومرة واحدة سمعت صوت عالى جداً فأتبعت الصوت لحد مالقيت ناس كتير أوى
فوقفت أتفرج فوجدت شخص يخلع ملابسه ويقول إنتو مش عارفين أنا مين أنا هعرفكم أنا مين
فسألت أحد الأشخاص من هذا الذى يتكلم
فقال أنت متعرفهوش
فقلت لأ والله
فقال ده مجرم خطير وعائلته كلها مجرمين وهتقوم مجازر هنا الآن
من الأفضل إلحق إمشى
وفى يوم آخر عند ركوب المترو من محطة حدائق حلوان شاهدت موقف غريب بعد تحرك القطار فبعض الناس قاموا بالقفز من تحت (عبرو من على شريط المترو) بنات وشباب فقام أمين الشرطة بالإمساك بأحد هؤلاء الشباب وقال له البطاقة
فقال له الشاب اشمعنى البنات
قاله الأمين وأنت مالك فدخلوا مكتب الضابط المسئول
فقال الضابط البطاقة ياأبو الكباتن
قاله الشاب إنتا مش عارف إنتا بتكلم مين
قالو لأ يأخويا معرفش ومش هعرف فأعطى الشاب البطاقة وكارنية الجامعة للضابط وقال له انا هعرفك أنا مين وفى حوالى 3دقائق جاء أمين شرطة ودخل مكتب الضابط وأخذ البطاقة والكارنية وقام الضابط بتوصيل الشاب لخارج المحطة عرفتوا ده مين؟
وفى يوم أخر أثناء ركوبى ميكروباص من التحرير فوجئت بأمين شرطة يأخذ المنادى ويقول له البطاقة
فقال له أشمعنى بقية الميكروبصات
فقال له الامين وإنت مالك
وأخذ المنادى والبطاقة ومشى
فسألت سواق السيارة أنت هتسيبوا
قالى ليه هو ميعرفش انا مين
ونزل السواق وبعد حوالى خمس دقائق جاء هو والمنادى
وتحرك الميكروباص
فسألت السواق أنت شكلك مهم
قالى ياأستاذ بخمسة جنية أخذت الواد والبطاقة وقال القرش بيعمل المستحيل
ها عرفتوا إحنا بنتكلم مع مين!
هل يوجد حل وماهو الحل؟
منتظر إجاباتكم وتعليقاتكم

بقلم / حاتم خميس
-----------------------------------------------------------------------
دم ..دم
*****
أنت هنا
إنت حائر جدا .. وتائه بلا حدود
كل يوم بشوفك
تصحى الصبح
تذوق طعم الضعف بمعلقة الندم
الموت أهون عليك من الألم
الدنيا تعمل فيها الخير تتسال وتتشتم
الدمع أدام عنيك بيترسم
البكى مر بس الضحك إنعدم
وحب السنين يضيع في لحظه و يتهبل
ونقول يا هووو إمتى منه نترحم
وتسهر ليلك داخل فيه ألف ليل ومليون شجن
والقمر إتنفى لإرض الظلام أصله بنظرات المحبين إتظلم
ومين زعم إن الحياه حلوه بس تتفهم
ومين سأل عني بحبل المشنقه عليه إتحكم
حبل الهموم الغموم ومأساة الزمن
وكلام كتير نفسي أقوله بس الوقت بيتخصم
قلبي إطعن .. حبي إترجم
كل شيء جميل فوق راسي إنهدم
لو إدايقت من كلامي هشممك ريحة الدم
دم دم قي كل مكان دم
ولو إني أملك آلة الزمن
كنت رجعت قبل إنفجار اللغم
قبل ما عمري منه يتخصم
قبل ما أي حرب في الدنيا تتعلن
والجيوش الميته تلتحم
والناس تموت و الأسرى تتسجن
دم دم في كل مكان دم
كل شيء دلوقتي بيتلعن
لما تشوف حلمك ادام عنيك بيتعدم
وقلولك مش هتقدر حتى لو جبت من العصفور لبن
لما تعمل مليون ذنب و يشاوروا عليك محترم
معنى الإخلاق.. الرجوله ..الشهامه .. الجدعنه
جوه القلوب إتخرم
دم دم في كل مكان دم
حبيت أطل عليك و أبص لقيتك أسوء
و قلبك كله إتخرم
حرام عليك نفسك
طول ما إنت عايش ممكن تقوم وتصرخ
أرجوك بلاش تتهزم
مش عارف ليه ممكن تبقى ملاك وتدخل جنة عدن
بس لو تبت وبدات من تاني
وده في حاله واحده لو فقدت الذاكره أو إنفجر في دماغك لغم
عشان بعديها هتعرف إنك غلط
و إن الفطره تخليك تبقى مؤمن و إنسان محترم

بقلم : أحمد شوقي
------------------------------------------------------------------------
تساؤلات تدور بخلدنا .. فهل من مجيب؟
**************************
ماذا يحدث لو تم رفع الدعم؟
هل توجد فرص عمل حقيقية؟
أين العدالة الإجتماعية؟
متى يشعر المواطن المصرى بكرامته خارج مصر .. وداخلها ؟!!
إلى أين يسير بنا غلاء الأسعار .. أإلى الجنون ؟أم الانتحار ؟
ما فائدة التعليم فى عصر الوساطة والمحسوبية ؟
هل نربى أبنائنا ونعلمهم ؟.. ام نلحقهم بالنادى الأهلى ونضمن مستقبلهم ؟
متى يتعلم الكبار أنهم فى طريق الفناء وأن العصر القادم هو عصر الصغار ؟أفلا يتركون ذكرى طيبة ؟
هل من الممكن أن يعود عصر عمر بن الخطاب ؟
متى ستحرر القدس ؟

بقلم :فريق العمل
-------------------------------------------------------------------------
سياسة الفراعنة
==========
تاريخ الفراعنة
======
كليوبترا 4
*******
بعد أن توليت أنا وأخى بطليموس الرابع عشر عرش مصر كما قلت لكم فى الحلقة السابقة
قتل قيصر عام 44ق.م , وهنا وقعت الفرقة بين أنصار قيصر وتجددت الحرب بينهما , حيث إنتصر أوكتافيوس
على أنطونيوس فى معركة موتينا ثم أصبح أوكتافيوس قنصلا عام 43ق.م وإتجه إلى الأتفاق مع بقية زعماء قيصر وهم أنطونيوس وليبروس وتقسمت الإمبراطورية بينهم , وبعد أن أنتصر حزب قيصر بزعامة أنطونيوس وأكتافيوس فى معركة فيليبى عام 43ق.م أسند إلى أنطونيوس تنظيم الولايات الشرقية
وصل أنطونيوس إلى أفسوس وإستدعى حكام الشرق الذين ساعدوه فيما عدا أنا , فأرسل إلى يحكى عن لقائه فى كيلكيا , وذهبت فى موكب ضخم تفوح منه روائح الشوق وسحره ,وإتجهت إلى طرسوس مستخدمة كل مالدى من وسائل لتحقيق السيطرة على أنطونيوس , وتوطدت علاقتى به , وعدت إلى الأسكندرية فلم يستطيع أنطونيوس البعد عنى وترك أحد أعوانه فى كيلكيا وفى الأسكندرية عبث ولعب وكان ذلك عام 40ق.م
لكن الظروف أجبرت أنطونيوس على الرحيل من الأسكندرية ليتخلص من زوجته فولكيا وليتصالح مع أوكتافيوس وعندما وصل إلى أنطاكيه إستدعانى وتزوجنا فى خريف 37ق.م وإعترف بولاية التوأمان منه الأسكندرهليوس وكليوباترا سلينى ومنحهما ممتلكات جدهما بطليموس فيلا دلفيوس وهى خالكيس
وسوريا الوسطى و كيلكيا وترافيا وقبرص وجزء من شواطئ فلسطين وفينقيا وذلك كهدية زواجه مني
وبذلك فقد إستعدت معظم أملاكى فى الخارج وعندما أنجبت مرة ثانية أسميت إبنى بطليموس فيلا دلفيوس تيمنا بممتلكات جده التى قد عادت

إنتهت الحلقة وإنتظرونى فى الحلقة القادمة والأخيرا لكليوبترا

بقلم / هدير عليوه
------------------------------------------------------------------------
سياسة بلدنـــــــــا
=======
إمسك حرامى
*********
بداية أحب ان اوضح لكم ان هذه القصة حدثت بالفعل فى مصرنا الحبيبة .. وستظل تحدث فى عصر البطالة ودون التطرق الى اسماء ابطالها دعونى ابدأ فى سردها ..
هى حكاية شاب بسيط يعمل على تأسيس نفسه حاصل على مؤهل فوق المتوسط وكالعادة لم يجد فرصة عمل فى الحكومة ، فعمل باحدى مكاتب وصلة الدش(السلكة) بمرتب بسيط لأنه لا يعلم شئ عن الدش أصلا ..
مر عليه عام وهو فى هذه المهنة وبحكم الخبرة أصبح كبير فنيين فى تركيب الدش والوصلات كما أصبح - نتيجة ثقة صاحب المكتب فيه لكفائته وأمانته وأدبه - مدير هذا المكتب الذى يعمل فيه ونال بفضل الله إعجاب منطقة بأكملها وثقتها الكاملة به .
وفى يوم من الأيام أثناء عمله وجد ناس تجرى عليه وتقوله إلحق إهرب البوليس بيدور عليك
وبعديها بدقيقة وجد أحد العاملين معاه يتصل به فجاوب عليه قاله إنت فين
فكان الرد والبكاء واضح فى الهاتف إلحقنا قبضوا علينا
فقال الشاب إنت ومين فقاله إحنا العشرة وقاعدين يضربونا جامد وعايزينك عشان يسيبونا
فقال له لاتخاف وطمنهم أنا جى حالا
فقال إحنا مالنا هما عايزين صاحب المكتب فقام بالإتصال بصاحب المكتب فوجده فى شرم الشيخ فقال الحل إيه
فقال له صاحب المكتب لا تخاف أنا هتصرف وأوعى تروح
فوقف الشاب مكتوف الأيدى لا يعلم ماذا يفعل ومرت حوالى نصف ساعة ثم وجد
زميله فى العمل يتصل فرد عليه وقاله ها إيه إلى حصل
فوجد ضابط الشرطة الذى يحدثه ويقول باللفظ
إحنا قبضنا على أخوك الصغير لو ماسلمتش نفسك خلال خمس دقائق هيجى معايا القسم وقفل السكة
فبكى هذا الشاب الذى لا يعرف ماذا يفعل فأخوه وزملائه مقبوض عليهم
وهو مطارد مثل المجرمين
ماذا سيفعل ؟
وفضل واقف فى الشارع وبعد ربع ساعة جاله إتصال أخر
وكان نفس الضابط قاله أنا فى القسم ومعاى العيال وهمشيهم علشان هما غلابة
بس مش هسيبك وفعلا نفذ الضابط ماقاله وبعد نصف ساعة وجد زملائه وأخوه يلومونه و يقولوا له إنتا هربت وسيبتنا
كانت صدمة له بس هما عندهم حق فهو كان فى حيرة
فقام بالإتصال بصاحب المكتب وقال له أنا سيبت الشغل
ورجع قعد على القهوة تانى وتدمر حلمه الذى كان يحاول أن يحققه
ماهو الحل لمثل هذا الشاب؟

بقلم / حاتم خميس
-------------------------------------------------------------------------
رومانسيات
=======
أحببتك
*****
أحببتك ولا أعلم لماذا أنتى
أحببتك ولا أعلم هل تحبينى
رأيتك فى أحلامى منذ زمن مضى
وتكرر حلمى بيكى
وتمنيت أن ألقاكى
فعدت أراكى
فى الصباح والمساء أراكى
عندما أفتح كتاب أراكى
عندما أخاطب أحد أراكى
عندما أنظر للبحر أراكى
عندما أنظر لزهرة الياسمين أراكى
ولا أعرف هل سيأتى اليوم الذى أراكى
كما أراكى فى أحلامى
وجاء هذا اليوم ورأيتك أحلى
أحلى من أحلامى
أحلى من أيامى
أحلى من عمرى اللى ضاع لكى أراكى
عدت لصبايه عندما رأتك عينى
عاد بي الزمن عندما رأتك عينى
ضحكت لي الحياة عندما رأتك عينى
بسمع صوت الكروان عندما تتكلمى
صوت أحلى من الأنغام عندما تهمسى
رنت ضحكتك جعلتنى أطير
مثل الطير الذى وجد أخيرا عشه
ومازلت لاأعلم هل تحبينى
هل تتمنى رجوعى لكى أراكى
أم سأظل أراكى فى أحلامى
ولن أراكى أراكى مرة أخرى

باحساس/ حاتم خميس
-------------------------------------------------------------------------
لحظة غرام
*******
لو كان العمر لحظة .. اتمنى أعيشها معاك
وإن كنت أتمنى فرحة .. تبقى فرحة لقاك
وإن كان البعد طول .. وشوقى زاد فى هواك
لو ألف عمر هاصبر .. واتحمل واستناك

أنا أى لحظة جنبك .. فى حياتى عمر جديد
والبسمة الهادية منك .. فى كيانى ضحكة عيد
ده انت فى بالى وقلبى .. انت حبى الوحيد
طول ما انت سعيد متهنى .. قلبى هيعيش سعيد

صورتك مالية عينيا .. وصورتى مالية عينيك
وقلبى دايب فى حبك .. حبك دوبنى فيك
وحنانك دوب قلبى .. من كتر حنانه ليـك
حبك علمنى أحبك .. علمنى إزاى اناجيك

باحساس : سالى قاسم
------------------------------------------------------------------------
كرهتك
*****
أنا بجد كرهتك
كرهت كل لحظة فيها عشقتك
كرهت يوم ما قابلتك
يوم ما عرفتك
بقيت في نظري مش إنسان
مش إنسان زى بقية البشر
انت..........
انت فعلا قلبك حجر
قلب يقطع الشجر
قلب يطفى ضى القمر
بقيت زيك زى غيرك
بعت وهان عليك ضميرك
كرهتك من كل حتة في قلبي
يا خسارة فيك حبي

باحساس : مها صلاح الدين
------------------------------------------------------------------------
إوعى تقول
*******
إوعى تقول أنا مشغول
كل الوقت مشغول علطول
ولابتهرب من حبك ليا
مش كل الحب ياروحى أسية
ولاالحب مجرد ذكرى
ولا الحب مجرد كلمة
هو أنا إيه موعود ليه
بكل حبيب يخون ويغيب
ولازمانى بيأسى عليا
وياخذ منى غلاوتك ليه
زى مابتأسى راح أأسى عليك
زى مابتنسى راح أنسى عنيك
أنسى إنى كان ليا حبيب
وأعيش أيامى بقلب جديد

باحساس / أحمد عبد الهادى
------------------------------------------------------------------------
وحشتوني يلي هجرتوني
****************
وحشتوووووني ....يلي هجرتوووني...
جيتووووو على بالي.. وانتوو ما ذكرتووني...
رحلتوووووو .. وطالت غبيتكم عني
...ليالي .. تطرووون على بالي...
وسنين... هجركم..ابد ما ذكرتووني
..يالله عسااكم... ما عرفتوووني..

باحساس : منيرة على صالح
------------------------------------------------------------------------
فانتــــازيا
======
مدينتى الفاضلة
**********
جئت إليكم اليوم لأحدثكم عن أجمل مدينة ممكن أن ترونها ألا وهى ؛ مدينتى الفاضلة .
كم أنا سعيدة بالحياة بها ولو كان الأمر بيدى لعشت بها أعمارا وأعمارا ..إن مدينتى الفاضلة غاية فى الروعة والجمال سماؤها صافية زاهية وشمسها شعلة دافئة تبث دفئا ونورا لا هى محرقة ولا تحجبها غيوم ولا سحابة سوداء .
وقمرها بدر فى كل الليالى كانه ملك متوج على عرشه ،يتلألأ من حوله النجوم كالدر المنثور، وماؤها عذب رائع المذاق لا لون له ولا رائحة ولا كلور..!
وان تحدثت عن طعامها سأكتب أشعارا ودواوين فما ذقت ألذ ولا أروع ولا أطيب منه فليس به كيماويات ولا مسرطنات
اما أهلها فأناس طيبون محبون متسامحون بشوشون ، ترى فى جوههم الضياء وفى عيونهم الصفاء ، لا يعرفون العبوس والتكشير ولا النميمة ولا الظلم ولا البهتان .. ولا أر الجيران .
وفى التجارة من انزه ما يكون .. يعطون أطيب ما لديهم لا يغشون المكيال ولا يطففون الميزان وأسعارهم فى متناول الجميع .
أما طرقها فواسعة ومريحة ليس بها مطبات ولا حركات وغير مزدحمة على الإطلاق وعلى كلا جانبيها تجد حدائق غناء تملؤها زغاريد العصافير وهدير السواقى ..
اما حاكمها فرجل من اعظم الرجال .. يرتدى على رأسه تاج من الماس ويمسك بيده عصا من الذهب الخالص صنعهم له أهالى المدينة الفاضلة من فرط حبهم له ومبايعتهم له .. وهو كذلك يحبهم ويحنو عليهم ولا يشغله عنهم شاغل .. فلا يستطيع النوم وهناك جائع أو فقير أو مريض من رعاياه .. ولا عجب فى ذلك فهو سيسئل عنهم يوم القيامة .
والمدهش فى مدينتى انها لا يوجد بها سرقة ولا قتل ولا تحرش ولا اغتصاب ، فالجميع بها أسرة واحدة ، إذا نقص من عند أحدهم شيئا اكمله له الآخرون .. فلا مجال للجرائم ولا حتى للتباغض .
كما ان مدينتى لا يوجد بها نواب .. فكل مواطن بها نائبا عن كل اهله ، وبيت الحاكم مفتوح دائما لسماع شكوى الاهالى التى نادرا ماتحدث بدون أن يعرقلهم وزراء ولا مدراء ولا حتى غفراء ...
فلا مجال للمواعيد والتليفونات ..فقد تستغربون أن مدينتى لا يوجد بها تليفون ارضى ولا موبايل ولا حتى الشبكة العنكبوتية .. فلا احد بها يحب الضوضاء أو العناكب !!
فالجميع مسالمون ونشيطون وكل من يريد الوصول إلى شئ يذهب بنفسه .. لا يوسط فلانا ولا علانا ليقضى له شئ حتى لا يحمله أعباءا اضافية على كاهله ..ولم الوساطة وكل شئ مباح ومتاح فى أى وقت بدون زحام ولا تعقيد ولا تهديد ولا وعيد ولا رشاوى ولا تبديد .

والآن ما رأيكم فى مدينتى الفاضلة ؟
هل هى فاضلة حقا كما أرى ؟
أم أن مدينتكم أفضل منها ؟
سؤال ينتظر إجابة ؟

هلوسة : سالى قاسم
------------------------------------------------------------------------
افتح قلبك وقوووووووووول
=================
مشكلة شعب
********
هذه المشكلة التى سأعرضها عليكم اليوم هى مشكلة شعب بأكمله
مشكلة أجيال قادمة نتمنى أن نجد لها الأمان فى الحياة
فذات يوم أثناء جلوسى على أحد المقاهى وجدت مجموعة من الرجال جالسين بقربى منزعجين
وبيقولوا مش عارفين هنعمل إيه
فأنضممت للحديث معهم وسألتهم هو فى مشكلة؟
فأجابوا جميعا بصوت واحد مفيش مشاكل خالص
وقال أحدهم مفيش مشكلة ، مالأسعار حلوة وبترخص
وأخر قال ومفيش طوابير على رغيف العيش
وأخر قال و المرتبات كبيرة أوى مش عارفين نصرفها فين
وقالوا جميعا إنت مش من البلد ده ولا إيه ؟
ثم قالوا إنت عايز مننا إيه ؟
فقلت لهم إيه المشكلة ياجماعة ؟ فقال أحدهم
الغلاء فى المعيشة.. فقالوا جميعا عرفت المشكلة إيه
قال أحدهم وإسمه عادل إسماعيل الحكومة عايزه الشعب ينتحر
وقال آخر وإسمه هشام محمد المرتبات تزيد خطوة خطوة أما الأسعار فتزيد بسرعة الصاروخ
وقال أخر وإسمه خالد إزاى هعيش أنا وعيالى بمرتب 400 جنيه
إزاى هدخلهم المدارس والجامعات
إزاى هلبسهم
إزاى هأكلهم
إزاى إزاى حاجات كتير أوى
وقال أخر وإسمه عصام وكمان هيشيلو الدعم هى ناقصة خراب
ها ياجماعة عرفتوا إيه المشكلة ؟
هل سنجد حل لهذه المشكلة التى تخص شعب بأكمله ؟
أم سننتحر على يد الحكومة كما قال عادل إسماعيل؟
أسئلة تطرح نفسها أمامكم نتمنى أن نجد لها إيجابات

بقلم / حاتم خميس
------------------------------------------------------------------------
مسابقة العدد
=========
عزيزى القارئ يسعدنا ان تتفاعل معنا بشكل كلى ليس فقط بقراءة موضوعاتنا وابداء رأيك الثرى فيها والذى نتشوق كلنا دائما لمعرفته وإنما أيضا بمشاركتنا ألعابنا ومسابقتنا ..لمزيد من التواصل والتقارب بيننا .
سيتم عرض مسابقة للقراء فى كل عدد وعلى من يرغب فى الاشتراك ارسال الحل على البريد الالكترونى التالى :
w.when@yahoo.com

المطلوب

إيجاد أطرف تعليق على هذه الصورة
الجائزة

يتم وضع التعليق الفائز واسم صاحبه على الصورة وتوضع فى جانب المجلة الأيمن

حظ سعيد للجميع ،،

فكرة وتقديم : سالى قاسم

-----------------------------------------------------------------------

تمــــــــــت بحمد الله